കണ്ണീരിന്റെ സ്വപ്‌നങ്ങള്‍..................

ദേവലോകത്തെ നന്ദനം പോലൊരു പൂന്തോട്ടം.
ഭൂമിയില്‍ കാണാത്ത പുഷ്പങ്ങളാല്‍ നിറഞ്ഞത്‌...
അങ്ങനെയൊന്നു ഇന്നലെ സ്വപ്നം കണ്ടു.
ഇതുവരെ കണ്ടിട്ടില്ലാത്ത ദേവദാരു പൂക്കളെ ആ കൂട്ടത്തില്‍ കുറെ കണ്ടു.
ഒരു നല്ല സ്വപ്നം.

ജനലിനപ്പുറം മഴയുടെ ശബ്ദം.
വാതിലില്‍ മുട്ടിവിളിക്കുന്നു.
മഴ പെയ്യുന്നു.
വേനലിലെ ആദ്യ മഴയെന്നു തോന്നുന്നു.
ഒരു തേങ്ങല്‍ എവിടെയോ ഉടക്കി നില്‍ക്കുന്നു.
പുറത്തേക്കു വരാന്‍ മടിച്ചിട്ടോ?????????????
അതോ കണ്ണീരായി വരുമ്പോള്‍ തുടച്ചു  മാറ്റാന്‍  ആ ഇളം ചൂടുള്ള വിരലുകള്‍ അരികില്‍ ഇല്ലാത്തതുകൊണ്ടോ??????????
അറിയില്ല.

നിന്റെ കിടക്കയില്‍ ഇന്നലെ നിറയെ അപ്പൂപ്പന്‍ താടികള്‍ വീണു കിടപ്പുണ്ടായിരുന്നു.
കുങ്കുമ പൂക്കള്‍ സുഖമുള്ള തലയിണകളും.
നിന്നോട് കലപില കൂട്ടാന്‍  ഓലെഞ്ഞാലികളും മുളം തത്തകളും അതിനു ചുറ്റും ഇരുന്നിരുന്നു.
തേക്കിന്റെ ഇലക്കുമ്പിളില്‍  നിറയെ മുല്ലമൊട്ടുകളുമായി അപ്പുറത്തെ വീട്ടിലെ അമ്മിണിക്കുട്ടി വന്നപ്പോള്‍  ആരും കാണാതെ നീ തന്ന ഉമ്മയുടെ സുഖത്തില്‍,അതിന്റെ ആലസ്യത്തില്‍ ഞാന്‍ ഇരിക്കുകയായിരുന്നു.
"എന്തെ മണിക്കുട്ട്യേച്ചി ഇങ്ങനെ ഇരിക്കണേ"ന്നു ചോദിച്ചപ്പോ,
എന്നെ കെട്ടിപ്പിടിക്കാനായി എത്തിയ ചന്ദന സുഗന്ധമുള്ള കാറ്റായ  നിന്റെ കൈകളില്‍ നിന്നും ഞാന്‍ നാണത്തോടെ ഒഴിഞ്ഞു മാറി.
മൈലാഞ്ചിയിട്ട എന്റെ കൈകള്‍ എത്തിപ്പിടിക്കാന്‍  നീ ശ്രമിച്ചപ്പോള്‍ ഞാന്‍  ഓടിയകന്നു.
വാഴ നാരില്‍ കെട്ടിയ മുല്ല മൊട്ടുകള്‍  അറ്റം വരെ  പിന്നിയിട്ടിരിക്കുന്ന എന്റെ തലമുടിയില്‍ വെച്ച്  കാണാന്‍ നിനക്കൊരുപാടിഷ്ടമാണെന്ന് ഒരിക്കല്‍ നീ പറഞ്ഞതില്‍ പിന്നെ ഞാന്‍ എന്നും അങ്ങനെയേ വെക്കുമായിരുന്നുള്ളൂ.

ഒരിക്കല്‍ ബാലഗോപാലനെ തൊഴാന്‍ ചുവന്ന കരയുള്ള സെറ്റ് മുണ്ട് ആദ്യമായി  ഉടുത്ത് പോയപ്പോള്‍  അപ്പോള്‍ പൊട്ടി വിരിഞ്ഞത് പോലെ നീ...................
അന്നത്തെ നിന്റെ കണ്ണുകളില്‍ ഉണ്ടായിരുന്ന കൌതുകം ഇതാ എനിക്കിപ്പോഴും കാണാം.
മുറ്റത്തെ ചെന്തെങ്ങിന്റെ താഴെ എന്റെ ഇഷ്ടത്തിന് ഞാന്‍ നിറയെ കനകാംബരം വെച്ച് പിടിപ്പിച്ചിരുന്നതില്‍ ഇപ്പൊ ഇടതിങ്ങി പൂക്കള്‍ വിരിഞ്ഞിരിക്കുന്നു.
യശോധയും,പൂവാലിയും നിന്നെ കാണാതെ വിഷമിക്കുന്നത് നീ കാണുന്നില്ലേ?

രാവിലെ മുറ്റത്തെ തുളസിത്തറയിലെ  കൃഷ്ണ തുളസിക്ക് നനയ്ക്കുമ്പോള്‍  ഒരു നാകമോഹന്‍ പക്ഷി നീണ്ട വാലൊതുക്കി  എന്നെ എത്തി നോക്കും.
ചിലപ്പോള്‍ ഞാന്‍ അകത്തേക്ക് ഓടിപ്പോയി  ജനലിലൂടെ പുറത്തേക്കു ഒളിച്ചു നോക്കും.
അപ്പോഴും അവിടെയിരുന്നു എത്തി നോക്കുന്നത് കാണാം.
നിന്റെ സ്നേഹം, ഇഷ്ടം ഒക്കെ എത്ര ആത്മാര്‍ത്ഥമാണ്,സത്യസന്ധമാണ്‌!!!!!!!!!!!!!!!!!!!!!!
ഞാനറിയുന്നു.
അതല്ലേ ആ നാകമോഹന്‍ വീണ്ടും വീണ്ടും എന്നെ തേടി വരുന്നത്???????????

വിരഹം എത്ര കഠിനമാണ്!!!!!!!

അറിഞ്ഞോ ഞാന്‍ നട്ട വെണ്ടയും,വഴുതിനയും,പാവലും,അച്ചിങ്ങയും,ഒക്കെ കായ്ച്ചു.
വറുക്കുവാനുള്ള ചക്ക മൂത്തു.
കാളനുള്ള മാമ്പഴം ആയിത്തുടങ്ങി.
കണിയ്ക്കുള്ള വെള്ളരി ആവാറായി.
മുറ്റത്തെ കൊന്നത്തൈ  ആദ്യായി പൂവിട്ടു.
ഒരു കുഞ്ഞു കുല കൊന്നപ്പൂവ്.
നിനക്ക് മുന്നില്‍ കൊണ്ട് വെച്ചത് നീ കണ്ടില്ലേ?
വിഷുവിങ്ങ് എത്തിയാല്‍ മതി.
ഈ തവണ നിനക്കുള്ള കണി ഒന്നൂടെ ഭംഗിയുള്ളതാവും കേട്ടോ.

എനിക്കുള്ള കൈനീട്ടം എന്താണ് ????????
മറ്റൊന്നും  വേണ്ട എനിക്ക് ,
എന്റെ നേരെ ആ കയ്യൊന്നു നീട്ടിയാല്‍ മതി.
നിന്റെ കൈ പിടിച്ച് ,നീ നടക്കുന്ന വഴിയിലൂടെ നിന്റെ കാല്‍പാദം പതിഞ്ഞതില്‍
എന്റെ കാല്‍പാദം ചേര്‍ത്ത്.................
നിന്റെ നിഴലായി ഒരു യാത്ര.
എന്റെ സ്വപ്നം.
എന്റെ മോക്ഷം.


കൊണ്ടുപോവാമോ???????????????
എന്നെ നിന്റെ ലോകത്തേക്ക്???????????????????