ദൈവത്തിന്റെ ചിരി.

ദൈവത്തിന്റെ ചിരി ഏറ്റവും മനോഹരമായിരുന്നു.
ആ ചിരി ആദ്യമായി കണ്ടത് 
 ചുണ്ടില്‍ നേര്‍ത്ത പാലിന്റെ മാധുര്യം ഇറ്റിച്ച,
നോക്കില്‍ സ്നേഹത്തിന്റെ കടല്‍ അലയടിച്ച,
തലോടലില്‍ ഇളം ചൂടിന്റെ കൂടെ പ്രാണന്റെ ചൂടും നല്‍കിയ അമ്മയുടെ മുഖത്തായിരുന്നു.
അമ്മയെന്ന  ദൈവികത,ആ ചിരിയുടെ അഴകിനെ ദൈവത്തിന്റെ ചിരി എന്ന് വിളിക്കാന്‍ ഇന്നും നിര്‍ബന്ധിക്കുന്നു.

രാത്രി നക്ഷത്രങ്ങളെ നോക്കി നിന്നാല്‍ സങ്കടവും,ദേഷ്യവും ഒക്കെ മനസ്സില്‍ നിന്നും പോവുമെന്ന് , കുഞ്ഞു നാളില്‍ എപ്പഴോ അമ്മ വഴക്ക് പറഞ്ഞതിന്  ദേഷ്യപ്പെട്ടും,സങ്കടപ്പെട്ടും 
പിണങ്ങി മാറി ഉമ്മറത്തെ തൂണില്‍ ചാരിയിരുന്നപ്പോള്‍  
അച്ഛന്‍ ആശ്വസിപ്പിക്കാന്‍ വന്നപ്പോള്‍ പറഞ്ഞിരുന്നു.
അപ്പോഴൊക്കെ അച്ഛന്റെ ചിരി ദൈവത്തിന്റെ ചിരിയാണ് എന്ന് വിശ്വസിച്ചിരുന്നു.
അതില്‍ പിന്നെ ദേഷ്യവും,സങ്കടവും വരുമ്പോഴും,
ആകാശത്തേക്ക് നോക്കും,നോക്കി കുറെ നേരം നില്‍ക്കും.

പ്രണയത്തിന്റെ മഴ പെയ്യിച്ച,
ആ മഴയില്‍ മഴവില്ല് തീര്‍ത്ത ,
അതില്‍ കേറി യാത്ര പോവാന്‍ കൂടെ വന്ന കൂട്ടുകാരന്‍........ .................
അവന്‍ നല്‍കിയ സ്വപ്നങ്ങളുടെ ഒരിക്കലും വാടാത്ത പനിനീര്‍ പൂക്കള്‍ കൊണ്ടൊരു കിരീടമുണ്ടാക്കി , തലയില്‍ വെച്ചപ്പോള്‍ അവന്‍ നോക്കി ചിരിച്ചു.
പിന്നീട് കണ്ട ദൈവത്തിന്റെ ചിരി അതായിരുന്നു.

പക്ഷെ ,
ദൈവത്തിന്റെ ചിരി എപ്പോഴും മനോഹരമായിരുന്നില്ല.
പലപ്പോഴും അഹങ്കാരത്തിന്റെ ആയിരുന്നു.
പ്രാണന്റെ പാതി ചേര്‍ത്തവനെ  അവന്റെ കൊട്ടാരത്തിലേക്ക് കൊണ്ട് പോയപ്പോള്‍ ,
ആ വേര്‍പാടില്‍ മനം നൊന്തു എന്ത് ചെയ്യണമെന്നറിയാതെ പകച്ചു നിന്ന അവളെ നോക്കി 
ദൈവം ചിരിച്ചത് കണ്ടപ്പോള്‍ ആ ചിരിയുടെ വൈരൂപ്യം വെറുപ്പായും,പിന്നീട് ഭീതിയായും മനസ്സില്‍ നിറയാന്‍ തുടങ്ങി.

ഓരോ നക്ഷത്രങ്ങളുടെയും പേര് പറഞ്ഞു തന്ന,അവരുടെ കഥകള്‍ പറഞ്ഞു തന്ന,
ഒരിക്കല്‍ വീണു പോയ ജീവിതത്തില്‍ നിന്ന് വീണ്ടും എണീക്കാനും നടക്കാനും പഠിപ്പിച്ച അച്ഛനെ മറ്റൊരു നക്ഷത്രമാക്കി എനിക്ക് മുകളില്‍ നിര്‍ത്തിയപ്പോള്‍ ,
പ്രിയപ്പെട്ടവരൊക്കെ നമ്മെ വിട്ടു പോയാല്‍ നക്ഷത്രമാകുമെന്നു വിശ്വസിപ്പിച്ച്  ദൈവം വീണ്ടും ചിരിച്ചു.
ഈ തവണ ആ ചിരി അവളെ  കരയിച്ചു.
അവള്‍ കരഞ്ഞു.
ഉറക്കെ ഉറക്കെ.

അവളുടെ  കരച്ചിലാണ് ആ ചിരിയുടെ ശബ്ദമെന്ന് തിരിച്ചറിഞ്ഞത് മുതല്‍ അവള്‍ കരയുന്നത് നിര്‍ത്തി.
പിന്നീട് ആ ചിരിയേക്കാള്‍ ഉച്ചത്തില്‍ അവള്‍  ചിരിക്കാന്‍ തുടങ്ങി .
അതുകണ്ടപ്പോള്‍ അമ്മ പറഞ്ഞു ദൈവത്തെ തോല്പ്പിച്ചവള്‍ ആണ്  എന്റെ കുട്ടി എന്ന്.
അപ്പോള്‍ അഹങ്കാരം അവള്‍ക്കാണ്  തോന്നിയത്.
പക്ഷെ ഇപ്പോള്‍ അവള്‍ മനസിലാക്കുന്നു.............

ദൈവമേ നീ തോല്‍ക്കുകയല്ല,അവളെ ജയിപ്പിക്കുകയാണ് ചെയ്തതെന്ന്.
നിന്റെ ചിരിയെ  പോലെ  മനോഹരമാക്കുകയായിരുന്നു നീ അവളുടെ  ചിരിയെ.
ആകാശത്തില്‍ ഇപ്പോള്‍  കാണുന്ന നക്ഷത്രങ്ങള്‍ ഒക്കെ അവള്‍ക്കു ചിരിക്കാന്‍ നീ നല്‍കിയതാണ്.
അവിടെ അവള്‍  കാണുന്നു അവളുടെ വിജയം കണ്ടു ചിരിക്കുന്ന  അച്ഛന്റെ ചിരിയെ.
അവിടെ അവള്‍ കാണുന്നു അവളുടെ കണ്ണുകള്‍ നിറയുന്നത് ഇഷ്ടമില്ലാത്ത അവളിലൂടെ  ഇപ്പോഴും ജീവിക്കുന്ന അവളുടെ  പ്രാണന്റെ സംതൃപ്തമായ ചിരി.

ഇപ്പോള്‍ അവള്‍ ചുറ്റിനും ഞാന്‍ കാണുന്നു ദൈവത്തിന്റെ ചിരി.
പ്രകൃതിയിലൂടെ.................
നന്മ നിറഞ്ഞ ഒരുപാട് കാര്യങ്ങളിലൂടെ..........
ഒരുപാട് മനുഷ്യരിലൂടെ...............

ദൈവമേ  നിന്റെ  ചിരി എന്നും മനോഹരമായത് തന്നെ.