ഞാന്‍ ഉറങ്ങട്ടെ!!!!!!!

നിദ്രയൊഴിഞ്ഞ ചില രാവുകളില്‍ കണ്ണുകളടച്ച് വെറുതെ കിടക്കാറുണ്ട്.

നിദ്രയെ കാത്തോ................അതോ സ്വപങ്ങളെ കാത്തോ.............അറിയില്ല.

അടഞ്ഞ കണ്ണുകള്‍ക്ക്‌ മാത്രം കാണാന്‍ സാധിക്കുന്ന ചില കാഴ്ചകള്‍ ഉണ്ട്.

തളരുന്നു എന്ന് തോന്നുമ്പോള്‍ താങ്ങാവാന്‍ വേണ്ടി ഉള്‍കണ്ണുകള്‍ സൂക്ഷിച്ച ചില കാഴ്ചകള്‍. .

അത് പ്രിയപ്പെട്ടവര്‍ നല്‍കുന്ന സ്നേഹമോ വേദനയോ അങ്ങനെ ഏത് ഓര്‍മ്മകളും ആവാം.

പലപ്പോഴും കണ്ണുകളടച്ചു വെറുതെ കിടക്കുമ്പോള്‍ ഇവ എന്നിലേക്കെത്തുന്നു .
എന്‍റെ ഓര്‍മ്മകള്‍ എല്ലാം തുടങ്ങുന്നതുമൊടുങ്ങുന്നതും  എന്നും,എപ്പോഴും നിന്നില്‍ തന്നെ.

ഏകാന്തത ..............

ചിലപ്പോഴൊക്കെ വേദനയും പേടിയുമാണ്.

 പക്ഷെ നിന്‍റെ പ്രണയം ഏറ്റവും അറിഞ്ഞതും അതില്‍ നിന്ന് തന്നെ.

രാത്രികളില്‍ ഒറ്റയ്ക്കിരിക്കുമ്പോള്‍ നടുമുറ്റത്തിരുന്നു ആകാശം നോക്കാന്‍ ഏറെയിഷ്ടം.

പലപ്പോഴും തോന്നിയിട്ടുണ്ട് ,

ഒറ്റപ്പെടുന്നു എന്ന തോന്നല്‍ ഓടി മറയാന്‍  ആകാശം നോക്കിയാല്‍ മതി.

നീ നിലാവായി എന്നെ നോക്കി ചിരിക്കുന്നു .

ഓരോ നക്ഷത്രങ്ങളിലും പ്രിയപ്പെട്ടവരുടെ മുഖങ്ങള്‍ തെളിയുന്നു.

എനിക്കൊപ്പം അവരും ഉറങ്ങാതെ കൂട്ടിരിക്കുന്നു.
മരങ്ങളും വള്ളികളും,ഇലകളും,

അവിടവിടെ എന്നെ ചിരിപ്പിക്കാന്‍ വേണ്ടി വിരിഞ്ഞുവെന്നു  തോന്നിപ്പിക്കുന്ന പേരറിയാ രാപൂവുകളും...............

മൌനത്തിന്‍റെ മനോഹാരിത ഏറുന്ന നിമിഷങ്ങള്‍................. ...................

എന്‍റെ ഒറ്റപ്പെടലിനെ എന്നില്‍ നിന്നും അന്യമാക്കുന്നവര്‍..

ഈ രാവില്‍ മഴയുണ്ട്.
മഞ്ഞുമുണ്ട്.
നിലാവായി നീയുമുണ്ട്.
പക്ഷെ കാര്‍മേഘങ്ങളുടെ കുറുമ്പ് നിന്നെ എന്നില്‍ നിന്നും ഒളിപ്പിച്ചിരിക്കുന്നു.

മിഴികള്‍ പൂട്ടിയാലല്ലേ നീ വരൂ.................!!!

നീ വരും,എനിക്കറിയാം.

കണ്ണുകള്‍ അടച്ചു അലസമായി കിടക്കുന്ന എന്നരികിലേക്ക് വരാതിരിക്കാന്‍ നിനക്കെങ്ങനെ കഴിയും!!!!!
മഞ്ഞില്‍ കുളിരുന്ന എന്‍റെ ശരീരത്തെ പുതപ്പിക്കാന്‍ 
ആരും കാണാത്ത പൂക്കളുടെ നനുത്ത സുഗന്ധമുള്ള,
പഞ്ഞി പോലെ മൃദുവായ 
നിന്‍റെ പ്രണയത്തിന്‍റെ ഇളം ചൂട് നല്‍കുന്ന 
മാന്തളിരിന്‍ നിറമുള്ള പുതപ്പും കൊണ്ട് 
ഈ മഴ മുഴുവനും നനഞ്ഞു നീ വരും.
ആ പുതപ്പിനുള്ളില്‍ എന്നെ ഒളിപ്പിച്ച് എനിക്കുറങ്ങണം.

ഞാന്‍ ഉറങ്ങുന്നവരെ മഴ പെയ്യണം.

മഴ മണമുള്ള എന്‍റെ തലമുടിയിഴകളില്‍ തലോടി നീ മൂളുന്ന താരാട്ട് കേട്ട്.........
സ്വപ്നങ്ങളുടെ സഞ്ചാര മാര്‍ഗത്തിലേക്ക്...............

എങ്ങു നിന്നോ ഒരു പാട്ട് കേള്‍ക്കുന്നുണ്ട്.
പ്രണയാര്‍ദ്രമായ ഒരു ശബ്ദം.

പാല പൂത്ത ഗന്ധവും,ആ ശബ്ദവും പേറി വരുന്ന കാറ്റേ..................
ഞാന്‍ ഉറങ്ങട്ടെ!!!!!!!