നീ നല്‍കുന്ന സന്തോഷങ്ങള്‍..............................

മട്ടുപ്പാവിലെ മരത്തിന്‍റെ അഴികള്‍ക്കിടയിലൂടെ എത്തുന്ന കാറ്റില്‍ എനിക്ക് പ്രിയമുള്ളതൊക്കെ എന്നെ തേടിയെത്തുന്നു.

അവയ്ക്കെല്ലാം നിന്‍റെ പ്രണയത്തിന്‍റെ ഗന്ധമുണ്ട്.

അവയിലെല്ലാം നിന്‍റെ ഓര്‍മ്മകളുടെ സങ്കടമുണ്ട്.

മുറ്റത്തിന്റെ അതിരില്‍ നില്‍ക്കുന്ന വലിയ കിളിച്ചുണ്ടന്‍ മാവിന്‍റെ ചില്ലകളില്‍,

ഇലകളുടെ തണുപ്പേറ്റു കിന്നാരം പറഞ്ഞിരിക്കുന്ന ഓലേഞ്ഞാലികള്‍ തമ്മില്‍ പറയുന്നത്

നമ്മളെ കുറിച്ചാവുമെന്നു ചിലപ്പോഴൊക്കെ എനിക്ക് തോന്നാറുണ്ട്.

കുരുമുളക് വള്ളിയില്‍ പിടിച്ച്,ഇലകളില്‍ ഇരുന്നു ആടാന്‍ ശ്രമിക്കുന്ന കുഞ്ഞു കിളികളെ കാണുമ്പോള്‍ 

എന്നെ ചിരിപ്പിക്കാനായി നീ പറഞ്ഞു വിട്ടതാണ് അവയെ എന്ന് ഞാന്‍ കരുതാറുണ്ട്.

തൊടിയുടെ അങ്ങേ അറ്റത്തു നില്‍ക്കുന്ന പൂത്ത മുളകള്‍ക്കിടയില്‍ വെളുത്ത നീണ്ട തൂവലുള്ള കഴുത്തിന്‌ കടും കറുപ്പ് നിറമുള്ള നാകമോഹന്‍ പക്ഷിയെ ആദ്യം കണ്ടപ്പോള്‍ എനിക്കുണ്ടായ അത്ഭുതം പറഞ്ഞറിയിക്കാനാവാത്ത ഒന്നാണ്.

പിന്നെ പിന്നെ ഇടയ്ക്കിടെ ഞാന്‍ അവിടെ കാണാറുണ്ട്.

ഒരിക്കല്‍ മുറ്റത്തെ ചെമ്പക മരത്തിനിടയില്‍ വന്നിരുന്നപ്പോള്‍ അത് നീ തന്നെയാണെന്ന് ഞാന്‍ വിശ്വസിക്കാന്‍ തുടങ്ങി.

നിനക്ക് പ്രിയപ്പെട്ട വരിക്കപ്ലാവില്‍ നീയൊരിക്കല്‍ ഒരു മയിലിന്‍റെ സൌന്ദര്യത്തില്‍ എനിക്ക് മുന്നിലെത്തി.

ആ മയില്‍ ഒരു കെട്ട് പീലികള്‍ ചേന തൈകള്‍ക്കിടയില്‍ പൊഴിച്ചപ്പോള്‍ 

അമ്മ പോലും പറഞ്ഞു അവന്‍ നിന്നെ ഒരുപാട് സ്നേഹിക്കുന്നുവെന്ന്.

ഇലഞ്ഞി പൂത്ത പടിയ്ക്കല്‍ അസ്തമയത്തിന്റെ ഭംഗി കാണാന്‍ ഞാന്‍ നിന്നപ്പോള്‍ എനിക്ക് മേലെ ഇലഞ്ഞി പൂക്കള്‍ തുരുതുരെ വീഴാന്‍ തുടങ്ങിയപ്പോള്‍ ഞാനും അതിശയിച്ചു.

നീയെന്നെ ഇത്രയേറെ പ്രണയിക്കുന്നല്ലോ എന്നോര്‍ത്ത്.

എന്‍റെ പ്രഭാതം എന്നെ ഉണര്‍ത്തുന്നത് നീയൊരു കുയിലായാണ്.

എനിക്ക് വേണ്ടി മാത്രം മൂളുന്ന ഒരു ആണ്‍കുയില്‍..

വെള്ളാരം കല്ലുകള്‍ പെറുക്കാനായി തോട്ടിലെക്കിറങ്ങിയപ്പോള്‍ എവിടെ നിന്നോ കൂട്ടത്തോടെ ഒരു കുടന്ന നിറയെ അപ്പൂപ്പന്‍ താടികള്‍ എനിക്ക് ചുറ്റും പറന്നു വന്നത് നിന്‍റെ കുസൃതിയായിരുന്നില്ലേ?

നിറയെ അപ്പൂപ്പന്‍ താടികള്‍ ഒട്ടിച്ച ഇളം പച്ച കടലാസ്സില്‍ "you are mine" എന്ന് നീയെനിക്ക് എഴുതി തന്നതിന്നും ഞാന്‍ സൂക്ഷിക്കുന്നു.

പ്രിയപ്പെട്ടവനെ,ഞാന്‍ മരിച്ചാലും നിനക്കൊപ്പം എന്നും ഉണ്ടാകുമെന്ന് നീ പറഞ്ഞതിന്‍റെ അര്‍ഥം ഞാന്‍ ഇപ്പോള്‍ മനസിലാക്കുന്നു.

വിധി എനിക്കും നിനക്കും ഇടയിലെ ദൂരം വീണ്ടും വീണ്ടും ഇല്ലാതാക്കിക്കൊണ്ടെയിരിക്കുന്നു.

ഒരു വിരല്‍തുമ്പിനറ്റം നീയിപ്പോള്‍...........................

എനിക്കടുത്തായുണ്ട്.

നിന്‍റെ കിടക്കയുടെ ചുറ്റും നിന്‍റെ ഇഷ്ടങ്ങളെല്ലാം ഞാന്‍ ചേര്‍ത്ത് വെച്ചിട്ടുണ്ട്.

നീ ഉറങ്ങുമ്പോള്‍ മുളകള്‍ കാട്ടിലൂടെ നിനക്കായി മൂളും.

നീ ഉണരാനായി ഇലഞ്ഞിയും,ചെമ്പകവും,നിന്‍റെ മേല്‍ സുഗന്ധം പൊഴിക്കും.

ഞാവല്‍ പഴങ്ങള്‍ നിന്‍റെ വിശപ്പകറ്റും.

നിനക്ക് പ്രണയിക്കാന്‍,നിന്നെ പ്രണയിക്കാന്‍ ഞാന്‍ എന്നും അവിടെയുണ്ടാകും.

ഒരിക്കല്‍ ഞാന്‍ വരും.

ഈ ഇഷ്ടങ്ങള്‍ക്ക് നടുവില്‍ നിനക്കൊപ്പം ഉറങ്ങാന്‍............................